Wot 15. do 17.08.2022 wotměješe so 1. serbski hackathon w medijowej etaži Serbskeho doma w Budyšinje. Přeprosyłoj běštaj Michał Cyž, kiž medijowu etažu nawoduje, a Daniel Zoba, naš Digiserb nerd a nimo toho społnomócnjeny za digitalizaciju pola Załožby za serbski lud.
Pod nawodom Daniela nawuknychu pjeć wobdźělnicy, kak móža sej z pomocu minicomputera Rasberry PI 4 (ma wulkosć kreditoweje kartki a jenož jednu platinu) swójski rěčny asistent natwarić.
Krok po kroku rozkładźe Daniel,
- kajke techniske dźěle su trěbne a hdźe móža so wobstarać
- kak so system hromadźe staji
- kajka software dyrbi so zasadnje za fungowanje techniki a konkretnje za spóznawanje rěče wobstarać a kak ma so instalować
- kak hodźi so system indiwiduelnje na wosobinske potrjeby přiměrić
W běhu třoch dnjow nastachu tóšto zajimawych idejow za wužiwanje tutoho techniskeho nastroja. Samo prěnje prototypy so hižo implementowachu, kaž móžeće sej we wideju z Michałom wobhladać.
Zarjadowanje je so kompletnje natočiło. Wšitke wideja namakaće jako playlist w našim kanalu na YouTube. We widejach zhoniće wšitko, štož dyrbiće wědźeć, zo bychće móhli sej doma sami system k spóznawanju rěče instalować.
