Załožba za serbski lud a Meta AI stej w nalěću kooperaciju w ramiku „Meta Language Technology Partner Porgrams“ (LTPP) wobzamknyłoj. Nazymu 2025 wozjewjeny system Omnilingual ASR, kotryž přez 1.600 rěčow podpěruje a awtomatizowane transkripcije zmóžnja, je rezultat tuteje kooperacije a podpěruje hornjo- kaž tež delnjoserbšćinu.
Přez integrowanje tuteje technologije so prěni króć tež delnjoserbska rěč zaměrnje do modernych digitalnych nastrojow zawjaza. Z nimi hodźa so delnjoserbske natočenja rěče awtomatisce transkribować a w tekstowej formje přenjesć. To wolóža nadźěłanje podtitulow, transkriptow, kubłanskich a archiwnych materialijow a přinošuje tomu, delnjoserbšćinu trajnje w digitalnym rumje pokazać.
Omnilingual ASR je open-source-system wot Meta AI a přez platformu Hugging Face swobodnje wužiwajomny. Web bazowana demo dowoli, zo móžeš awdijowe abo widejodataje direktnje uploadować, a pokazuje, kak wšelako hodźi so technologija za małe a wohrožene rěče zasadźić.
Za serbskorěčne zhromadźenstwo nastanje z tym nowy přistup ke KI-zepěranym nałožowanjam:
• awtomatiska transkripcija serbskich medijow
• podtitulowanje w delnjoserbšćinje
• Natwar digitalnych rěčnych korporow
• Podpěra kubłanskich a kulturnych projektow
„Kooperacija zmóžnja nam, zo so serbšćina načasnje wopřimny a digitalnje spřistupni“, wuswětli Załožba za serbski lud. Partnerstwo sadźi wažny signal za prezencu a zaručenje přichoda serbskeju rěčow w přiběracym digitalnym swěće