Dźensa chcemy wam předstajić jara jednoru a tohorunja přewidnu wariantu za zhromadne wobdźěłanje dokumentow w syći. Mjenuje so „Etherpad“ (hlej https://etherpad.org/), přistup poskića so wot wšelakorych stronow. Lisćinu tak mjenowanych „instancow“ namakaće tule: https://github.com/ether/etherpad-lite/wiki/Sites-That-Run-Etherpad. Móžeće tež sćěhowacu instancu wužiwać: https://etherpad.serbski-inkubator.de/. Kedźbujće pak prošu na to, zo ma kóžda instanca swójske prawidła nastupajo wobstajnosć datow.
Ručež sće sebi tajki „Etherpad“ wutworili, móžeće wotkaz z wšěmi wobdźěłarjemi dźělić a zhromadnje na dokumenće dźěłać. Při tym so žana změna njezhubi, wšako móžeće přeco wróćo na prjedawši staw dokumenta. A hdyž sće potom hotowi, prosće eksportujeće dokument do trěbneho formata (pdf, doc, odt, txt a dalše).
Přez nastajenja móžeće tohorunja rěč powjercha přestajić, a tam stej hornjo- a delnjoserbšćina zapołoženej. A jeli-zo dźěłaće z browserom „Firefox“ a z rěčnym pakćikom za hornjo- abo delnjoserbšćinu, móžeće samo prawopisnu kontrolu wužiwać.
Nětko maće wšitko hromadźe za wuspěšne zhromadne dźěło na dokumentach – tak do dźěła zdar!
