Społnomócnjeny za digitalizaciju pola Załožby za serbski lud Daniel Zoba, běše wot 25. do 28. nowembra zhromadnje z Ivanom Kraljevskom z Fraunhoferoweho instituta za keramiske technologije a systemy IKTS Drježdźany na SPECOM konferencu 2024 (26. konferenca za rěče a kompjutery) do Běłohroda w Serbsikej přeprošeny. Organizatorojo konferency běchu jeju prosyli, zo byštaj wědomostny spis zapodałoj a na zahajenju komunikaciskeho foruma wjetšemu publikumej serbski lud a awtomatiske spóznawanje serbskeje rěče předstajiłoj. Přeprošenje na konferencu a eksplicitna próstwa wo zapodaće spisa stej wosebite hódnoćenje wuslědkow a zhromadneho dźěła IKTS a załožby. Dokelž so organizatorojo konferency wosebje za serbski lud zajimowachu, wěnowaštaj so Daniel a Ivan w prěnim dźělu přednoška Serbam a wosebitošćam serbšćiny. W druhim dźělu rozłožeše Ivan Kraljevski techniske detajle a dotalne wuwića na polu spóznawanja rěče, awtomatiskeho přełožowanja a rěčneje syntezy w serbskim konteksće. Na konferency móžeštaj so wo najnowšich wuwićach na tutym polu, wosebje nastupajo mjeńšinowych rěčow, kotrež maja jenož mało resursow, informować, a kontakty do uniwerzity Novi Sad natwarić.
Přednošk Daniela a Ivan móžeće sebi na YouTube wobhladać. Samo serbske podtitule móžeće sebi nastajić. Za to wuzwolće prošu rěč „Slowakisch“.
Wozjewjeny spis namakaće pod link.springer