Póndźelu, 23. januara 2023 předstajištaj dr. Astrid Schmiedelowa a Jan Měškank, rěčespytnikaj při Serbskim instituće, w Budyšinje aktualny staw wuwića serbskeju předčitanskeju funkcijow. Wotnětka stej hornjoserbski hłós “Matej” a delnjoserbski “Juro” zjawnje přistupnej. Tuta prěnja wersija je wažny mjezywuslědk slědźerskich prócowanjow Serbskeho instituta, kotrež Swobodny kraj Sakska z dotal 700.000 eurow spěchuje.
Předčitanska funkcija budźe bjezbarjerny přistup k serbšćinje bytostnje polěpšować. Wužiwać hodźi so za předčitanje hornjo- a delnjoserbskich webstronow, ale tež za připowědźenja na dwórnišćach abo w busach za připowědźenje zastanišćow. Lětsa chcedźa rěčespytnicy znajmjeńša hišće jednu dalšu wersiju Jura a Mateja wozjewić. Z poskitkom darmotneje a jednorje nałožujomneje słužby (nimo wědomostnych wozjewjenjow) ma so projekt wotzamknyć.
Nětko přeprošuje Serbski institut wužiwarjow, zo bychu Jura a Mateja wupruwowali. Waše nazhonjenja a pokiwy sposrědkujće na e-mejlowu adresu feedback-juro-matej@serbski-institut.de.
Předčitanska funkcija je (hišće we wuwićowej wokolinje) docpějomna pod: http://tts-juro-matej.serbski-institut.de/.
Cyłu medijowu zdźělenku a dalše informacije namakaće na webstronje Serbskeho instituta.
