Źinsa comy wam pśedstajiś wjelgin jadnoru a tejerownosći pśewidnu wariantu za zgromadne wobźěłanje dokumentow w seśi. Toś tomu se pomjenjujo „Etherpad“ (glědaj https://etherpad.org/), pśistup póbitujo se wót wšakorakich bokow. Lisćinu tak pomjenjonych „instancow“ namakajośo how: https://github.com/ether/etherpad-lite/wiki/Sites-That-Run-Etherpad. Móžośo teke slědujucu instancu wužywaś: https://etherpad.serbski-inkubator.de/. Glědajśo pak pšosym na to, až ma kužda instanca swójske pšawidła nastupajucy wobstawnosć datow.
Gaž sćo sebje taki „Etherpad“ napórali, móžośo pokazku ze wšyknymi wobźěłarjami źěliś a gromaźe na dokumenśe źěłaś. Pśi tom se žedna změna njezgubijo, wšako móžośo pśecej slědk na pjerwjejšny staw dokumenta. A gaž sćo pótom gótowe, jadnorje eksportěrujośo dokument do trjebnego formata (pdf, doc, odt, txt a dalšne).
Pśez nastajenja móžośo tejerownosći rěc pówjercha pśestajiś, a tam stej górno- a dolnoserbšćina nałožowanej. A jolic źěłaśo z browserom „Firefox“ a z rěcnym pakśikom za górno- abo dolnoserbšćinu, móžośo samo pšawopisnu kontrolu wužywaś.
Něnto maśo wšykno gromaźe za wuspěšne zgromadne źěło na dokumentach – tak do źěła!
