Pućnik po digitalnym swěće je zběrka přinoškow Budyskeho studija LUCIJA, kotrež so měsačnje w dźěćacym časopisu PŁOMJO medijowym temam wěnuja.
Brošurku móžeće sej tu online wobhladać abo sej ju w papjerjanej formje wobstarać.
Runje w dźensnišim času – hdyž digitalny swět młodym ludźom mnoho šansow a móžnosćow wotwěra – je rozumne wobchadźenje z medijemi wažny měznik, zo móhli wšitcy w tutym wobłuku aktiwnje sobu skutkować, so angažować ale so tež před skřiwdźenjom škitać a so jemu wobarać.
Nimo medijopedagogiskich doporučenjow namakaće w zběrce tež informacije wo techniskich a historiskich pozadkach kaž tež praktiske pokiwy a inspiracije, kotrež budu wam snano k pomocy.
Sposrědkowanje medijoweje kompetency je jedyn z třoch tematiskich stołpow studija LUCIJA. Tuž pohladajće runjež hdys a hdys na webstronje www.lucija.de a tu pola nas na www.digiserb.de. Tam namakaće wšitko dokoławokoło aktualnych projektow a wuwića na polu digitalizacije serbšćiny. A k tomu tež přehlad serbskich appow a druhich pomocnych srědkow.