Tež w lěće 2023 smy spóznawanje rěče za hornjoserbšćinu dale polěpšili. Wobšěrnu rozprawu lěta 2023 móžeće sebi z tuteje strony dele sćahnyć a wšitke informacije wo dotalnym wuwiću namakaće tu. Ćežišćo aktiwitow bě zaso dźěło na rěčnych modelach. Akustiske modelěrowanje a słownik wurjekowanjow ma hižo wěsty staw, tak zo hodźi so jeničce přez wjace treningoweho materiala abo dalše eksperimenty z fonetiskim inwentarom polěpšić.
Nimo polepšenja technologije ma so aktualny staw za wužiwarjow zestupnić. Za to smy wuwili internetnu stronu, na kotrejž dóstanje kóždy za hornjoserbski wideo abo audio awtomatiski transkript. Posłužowanje je jara jednore:
- wuzwol swoju dataju (na přikład „wav“ „mp3“ „mp4“ „avi“ – a dalše formaty)
- wuzwol kontekst (normalnje „powšitkowny“)
- wuzwol format dataje
- startuj wobdźěłanje
Po tym zo sy něšto časa čakał/a, maš transkript jako ryzy tekst abo jako dataja podtitulow („srt“) . Chcešli swoje podtitule dale wobdźěłać, doporučamy ći software „Subtitle Edit“. Hotowe podtitule móžeće potom n. př. we wideju na Youtube přidać. Wideo dyrbiće potom jako „Deutsch“ woznamjenić a podtitule pod „Slowakisch“ přidać, dokelž Youtube dotal hornjoserbšćinu njeznaje.
Kak nětko dale? Frauenhofer IKTS je nam na tute prašenje jednu strategiju (jendźelsce) nadźěłał, w kotrymž je aktualny staw za hornjoserbšćinu dokładnišo rozłoženy, a w kotrymž tež wšelake perspektiwy nadrobnišo rozklučuja, kaž na přikład:
- komercielne systemy spóznawanja abo z wotewrjenym codom?
- klasiske spóznawanje rěče abo KI (abo woboje)?
- hdyž KI, kotry system z mnohich?
- radšo teksty abo nahrawanja zběrać?
Wuspytajće rady raz nowu stronu a prajće nam, hač funguje a kotre ćeže su nastali. Wjeselimy so na kotružkuli powěsć!
