Hižo wjacore lěta so Serbja wo zapřijeće serbšćiny na wulkich digitalnych systemach a platformach kaž Google, Windows, Apple prócuja. Nětko smy dalši měznik docpěli: Youtube móže serbsce!
Nichtó z wěstosću rjec njemóže, što bě rozsudny kamušk za tutón epochalny wuspěch: hač dźesatki mailkow najwšelakorišich serbskich akterow, hač strategije institutow a institucijow, hač próstwa wo podpěru Vatikanej. Abo wony připad, zo běše serbski koordinator za digitalizaciju Daniel Zoba na konferency njedawno w Parisu sobudźěłaćerja GOOGLE při kofeju na tematiku narěčał. Fakt je: wotnětka tež Youtube našej maćeršćinje (Obersorbisch, Niedersorbisch) podpěruje. To wolóža serbskim akteram na polu digitalnych medijow na přikład přistup ke korektnemu podtitulowanju a zo system serbšćinu spóznawa. Zdobom je to wažna referenca za dalše digitalne předewzaća, kotrež móža so nětko tež na to poćahować, zo je serbšćina jedna z mało rěčow w lisćinje youtube, kotrež system podpěruje – z cylkownje něhdźe 7.000 rěčow na swěće.