Naš zaměr je, serbsku hudźbu we wšěch swojich fasetach – wot klasiki hač rocka, bajkow hač do słuchohrow – šěrokemu publikumej spřistupnić. Za to smy zjawny streamingowy a download-poskitk za serbske zwukonošakowe produkcije natwarili, kotrež so wot Załožby za serbski lud podpěraja.

Zo bychmy dźensnišim konsumowym zwučenosćam wotpowědowali a předewšěm młodych Serbow narěčeli, smy modernu streaming- a download-słužbu zarjadowali. Tak hodźa so serbske wobsahi lochko namakać a wužiwać. Z projektom smy 2019 započeli.

Dźěłamy hromadźe z Zebralution tzwr, wodźacym poskićerjom digitalnych medijowych wobsahow. Přez to móžemy z wjace hač 100 znatymi platformami kaž Spotify, Amazon Music, Deezer, Google Play a Apple Music kooperować a našu hudźbu šěrokemu publikumej prezentować.

Za bjezporočny wotběh projekta běchu někotre předdźěła trěbne. Smy awdijo-dataje, cover a metadaty technisce spřihotowali a label „Sorbian Music“ załožili. Runočasnje smy datowu banku zestajeli, zo bychmy dotalne awdijowe medije katalogizowali a kategorizowali. W běhu projekta smy na techniske wužadanja storčili. Při testowym běhu smy zwěsćili, zo trjebamy přidatny čas programěrowanja a wuwića, zo bychmy serbske pismiki korektnje předźěłali.

Zo bychmy label „Sorbian Music“ zeznajomili, smy swójsku webstronu wuwili. Tam prezentujemy wuběr na CDjach a skićimy direktny přistup k streaming-słužbam. Naša webstrona je w němčinje, hornjoserbšćinje, delnjoserbšćinje a jendźelšćinje přistupna. Přidatnje k CDjam poskićamy tohorunja wuběr serbskich hudźbnych widejow wot YouTube, zo by so wšelakorosć w serbskim hudźbnym businessje wuzběhnyła.

Smy wobstajnje při tym, wužiwanske prawa za dalše CDje wujasnić a poskitk wobstajnje rozšěrjeć.